親父へのアーグ／下地勇 歌詞

歌：下地勇

作詞：下地勇

作曲：下地勇

家んかい来すちか むぬうばゆまん
肴やカチューぬ刺身とぅ アース゜ぬ塩煮
ビール小を呑み テレビやNHK
薄暗ーちぬ二番座ん居てぃ ただ二度どぅ笑いす゜だき

お父や恐すかんち いっう゛ぃー回りうたー幼少頃まい
今んなりば懐かすむぬ 我達まいどぅ年う取いきしゅう
今日がーまーすぬ疲りや 門口ん降らしてぃ
明日ぬ心配まい無ん振す゜ばしーどぅ ビール小を呑みーうー

いつ世がみまい NHKや出でぃうーば
いつ世がみまい ビールまい刺身小まいありうーば
いつ世がみまい 年さ取らばんまい ゆぬむぬやば
いつ世がみまい 頑強かりー うりふぃーるよ

自分が一人しどぅ 成長いたーんぎ顔をしー
父母を世話す゜ 暇まいにゃーん振す゜ばしー
ブーギ゜なぎ゜加勢やーつ 繁多かーばちどぅ逃ぎばーき回り
子ぬきゃあ めーげーやーつ見いだな 自分が道ゆばーきどぅ歩きーうー

あんしうすけー父母や 七十歳んかいどぅなりーどぅ
一度ち座し゜ちか 何ちやにゃーん んな一度ちや立たん
太陽ぬ憩いば ぴょーす小んな膝う撫でぃ
今日捕いき゜たー魚う 子ぬきゃぬむてぃちどぅ 段ボールんかい込みーうー

いつ世がみまい 父母や家ん居す゜むぬちどぅ思いどぅうー
いつ世がみまい ビール小を呑みゅうむぬちどぅ思いうー
いつ世がみまい ブーギ゜う植びうーぱずちどぅ思いうー
いつまい我達子ぬきゃあ自分勝手んどぅ かんし思いうー

サニツぬ シナかじ アガス゜ザー御嶽ぬ ザーグル
ズガキ゜浜ぬ ウガンバーリー 十五夜ぬ シーサータース
時代や変りーぴらばん 年さ取いぴらばん
いつ世がみまい 忘やならんむぬぬ ありうーぱず

いつ世がみまい 山羊ぬ草を刈りうり お父
いつ世がみまい 舟小ん乗り 魚う捕いうり
いつ世がみまい 段ボールん入し゜魚う送りふぃーる
いつ世がみまい 頑強かり うりふぃーるよ

いつ世がみまい NHKや出でぃうーば
いつ世がみまい ビールまい刺身小まいありうーば
いつ世がみまい 年さ取らばんまい ゆぬむぬやば
いつ世がみまい 頑強かりー うりふぃーるよ